దీప సుందరి

దీప సుందరితోటి సాపత్యమా నాకు
దీప సుకుమారి దరిదాపు చనగలనా !

రంగుకోక ధరించి
రాజు రాక తపించు
నీడలను తెలివి విడ
నాడి కన నుంకించు
దీపసుందరి...

రెప్ప వాల్పక మింట
లెక్కించు చుక్కలను
అలికిడికి వులికిపడు
నలుదెసల విరగబడు !
దీపసుందరి...

నిలువంత చెవి జేసి
పిలుపు విన నోరగిలు
కటి బిగించును శిరసు
కాని లెమ్మని విసురు
దీపసుందరి...

కెవ్వుమని కిందబడు
నవ్వు నాలుక సాచు--
"రాజా" యనుచు నెగిరి
"రా రా " యనుచు కునుకు
దీపసుందరి...

వేదన సుఖాన మను
వెలుగుచు సుఖాన చను
దీపసుందరి...


రచన : నండూరి సుబ్బారావు
ప్రచురణ: నవరత్న బుక్ హౌస్