నటీ నటులు

"ఎంకి నా పేరితని
కేమి లేదట వీని
నెవరెరుగ రంటా !"
"నామకా నామకుల నటనె నేడంతా"


"యుగయుగము ఒకరొకరి
తగిలినామట, చేయి
మిగిలినామంటా!"
"పగలు రేయలు సుంత పట్టుబడకుండ"

"వాలి కౌగిలి సుకము
నేలినామట చూపు
కలిపినామంటా!"
"ఆకసము భూమి యటు లంటుకోకుండ"

"ఒక్కటై సరసాల
చొక్కినామట మింటి
కెక్కినామంటా!"
"బింబ ప్రతిబింబములు వీడి విడకుండ!"

"ఇంత యెంకితో నటన
యెవ్వరోనట యీత
డెవ్వరోనట, యెంకి
రవ్వపాలంటా!"
"ప్రకృతి సుందరి జంట వరుస కెటులంట!"


రచన : నండూరి సుబ్బారావు
ప్రచురణ:నవరత్న బుక్ హౌస్