ముందు గతి

ఎక్కవే, కొండ నెక్కవే!
నా సక్క నెంకి యెక్కవే!
కొండ నెక్కవే!

పక్క సూపులు మాని
పయికెల్లి పోదాము!

యెక్కవే,కొండ నెక్కవే!
నా సక్క నెంకి నెక్కవే!

ముందు నువ్వుంటే నే
కిందా నిలబడగలను
నీ నీడనే తొక్కు
కొని సులువుగ రాగల

యెక్కవే,కొండ నెక్కవే!
నా సక్క నెంకి నెక్కవే!

నాలు గడుగు లేసి
నవ్వుతో పిలు యెంకి
పిలుపు నవ్వే నాకు
ములగఱ్ఱ కాగలదు!

యెక్కవే,కొండ నెక్కవే!
నా సక్క నెంకి నెక్కవే!

తెల్లని నీ పైట
సల్లంగ యిసురోలె
ఆ గాలి నా కాలి కట్టె
బగ బగ మండు

యెక్కవే,కొండ నెక్కవే!
నా సక్క నెంకి నెక్కవే!

పది మెట్లు పయికెల్లి
పల్లకుండా సూడు
పగబట్టు పామల్లె
పయికి సర్రున వత్తు

యెక్కవే,కొండ నెక్కవే!
నా సక్క నెంకి నెక్కవే!

యెల్లెల్లి పయికెల్లి
యిద్దరము కలిసి
మూట లివతల పెట్టి
మునిగి పోదము పైనె

యెక్కవే,కొండ నెక్కవే!
నా సక్క నెంకి నెక్కవే!

రచన: నండూరి సుబ్బారావు
ప్రచురణ: నవరత్న బుక్ హౌస్