పడవ

ఆపలేనే యెంకి యీ పడవ యిసురు!
పాడలేనే యెంకి పదము లీ రొదలో!

పడవ సల్లగ నడిపి
పదము సదు వంటావు!
కస్సుమంటూ యేరు
గాలి నెగదోసింది!

ఆపలేనే యెంకి యీ పడవ యిసురు!

వోరుగాలే పాట
దారి కడతా వుంది !
బేటి కురికే పాట నోట
నోట గొడతా వుంది!

ఆపలేనే యెంకి యీ పడవ యిసురు!

తల మలుపుకొని పాట
తరలింది కామోసు!
దేముడల్లే లోనె
తిరుగుతున్నా దేటో!

ఆపలేనే యెంకి యీ పడవ యిసురు!

యెన్నెలంటే పాట
కెంత మనసవుతాదో
పాట సాగేతలికి
పయన మే మవుతాదో!

ఆపలేనే యెంకి యీ పడవ యిసురు!

రచన : నండూరి సుబ్బారావు
ప్రచురణ : నవభారత్ బుక్ హౌస్